22. mars
Fundur  í vallarnefnd GG miðvikudaginn 24.mars  kl 18:00 í Golfskálanum

Dagskrá:

1. Starf vallastjóra
2. Starfsmannamál
3. Vorverk
4. Yfirlit yfir tækjabúnað
5. Tækjakaup
6. Opnun vallar
7. Önnur mál

16. mars
Teikningar af nýjum skála (hugmyndir)

Á aðalfundi GG í desember síðastliðnum lagði Jón Guðmundsson (Jón pípari) fram hugmyndir af teikningum að nýjum skála sem yrði staðsettur þar sem íbúðarhús og tækjageymsla okkar er í dag.  Jón lét gera þessar teikningar á sinn eigin kostnað með framtíðarsýn á nýju vallarstæði í huga.  Kunnum við honum bestu þakkir fyrir framtakið.  Þess ber að geta að aðeins er um að ræða hugmyndir aðhugsanlegum skála en engin ákvörðun hefur verið tekin af félagsmönnum hvað það varðar. Miðað við stækkunartillögur frá Hannesi golfvallahönnuði og sem verkáætlun byggir á, er skálinn hugsaður þar sem íbúðarhúsið er nú staðsett.  Hér má sjá tekningarnar.  Smelltu á til að stækka þær.

7. mars
Bjarni Þór Hannesson ráðinn vallarstjóri

Bjarni Þór Hannesson var í gær ráðinn vallarstjóri á Húsatóftavelli hjá Golfklúbbi Grindavíkur. Bjarni skrifaði undir samning til loka október á þessu ári með ákvæði um áframhald á starfi hjá klúbbnum ef vel gengur.

Bjarni, sem tekur við starfinu á Húsatóftavelli af Guðjóni Einarssyni, er sonur Hannesar Þorsteinssonar golfvallarhönnuðar, en verið er að stækka Húsatóftavöll í 18 holur eftir hönnun Hannesar. Bjarni hefur verið með annan fótinn á golfvelli frá því að hann var lítill patti á Akranesi og hefur unnið á golfvelli frá unglingsaldri. Hann hefur m.a. starfað á Korpúlfstaðavelli og var um tíma vallarstjóri á Garðavelli á Akranesi.

Það er óhætt að segja að Bjarni sé mikill hvalreki fyrir lítinn klúbb eins og Golfklúbb Grindavíkur sem telur rétt rúmlega 200 meðlimi. Bjarni býr yfir mikilli þekkingu á golfvallarfræðum og hefur m.a. unnið á St. Andrews og Sunningdale völlunum í Bretlandi.

Hann er með Master gráðu í Íþróttavallayfirborðstæknifræði en hann hefur bæði stundað nám í Bretlandi og í Bandaríkjunum.

5.mars
Leifur Guðjónsson hættir í stjórn

Leifur Guðjónsson hefur tilkynnt stjórn Golfklúbbs Grindavíkur að hann hafi ákveðið að hætta í stjórn frá fimmtudeginum 4. mars að telja.    Stjórn Golfklúbbsins óskar honum velfarnaðar í framtíðinni.

4 mars
Ingimar Waldorff hættir í stjórn GG

Ingimar Waldorff hefur tilkynnt stjórn Golfklúbbs Grindavíkur að hann hafi ákveðið að hætta í stjórn frá sunnudeginum 28. febrúar að telja.    Hann mun þó ekki alveg segja skilið við stjórnina þar sem hann mun aðstoða þann sem tekur við gjaldkerastöðunni að komast inn í gjaldkeramálin.  Ingimar hefur undanfarið ár verið gjaldkeri golfklúbbsins og stjórn Golfklúbbsins þakkar honum góð störf og óskar honum velfarnaðar í framtíðinni.

3 mars
GSÍ heldur dómaranámskeið á næstunni

Dómaranefnd GSÍ hefur skipulagt golfdómaranámskeið nú á útmánuðum hér á höfuðborgarsvæðinu.  Staðsetning verður ákveðin eftir fjölda þátttakenda og kemur til greina að halda námskeiðin í golfklúbbunum ef þátttakendur skiptast með þeim hætti. Staðsetning verður kynnt fljótlega eftir að skráning liggur fyrir.  Golfklúbbur Grindavíkur hvetur áhugasama félaga til að hafa samband við Pál formann á gggolf@gggolf.is .  Það er klúbbnum nauðsynlegt að hafa félaga innan okkar raða með dómararéttindi. Golfklúbburinn greiðir fyrir þann kostnað sem útleggst vegna námskeiðsins.

Héraðsdómaranámskeið:
Námskeið 1, Mánudaginn 15. mars og miðvikudaginn 17. mars n.k. og hefjast námskeiðin kl.19:00 og standa til kl.22:00 báða dagana. Kennarar eru þeir Þorsteinn Sv. Stefánsson, Aðalsteinn Örnólfsson, Þórður Ingason og Hörður Geirsson.

Námskeið 2, Þriðjudaginn 23. mars og fimmtudaginn 25. mars n.k. og hefjast námskeiðin kl.19:00 og standa til kl.22:00 báða dagana.Kennarar eru þeir Sigurður Geirsson, Aðalsteinn Örnólfsson, Þórður Ingason og Hörður Geirsson.

Námskeið 3, Laugardaginn 27. mars og hefst námskeiðið kl. 10:00 og stendur til 17:00. Kennarar eru þeir Sigurður Geirsson og Kristján Einarsson.

Námskeiðið er ókeypis og er opið öllum þeim sem eru skráðir í golfklúbb inna GSÍ, lágmarksþátttaka er 8 kylfingar. Skráningarfrestur er einn vika fyrir upphaf hvers námskeiðs, áhugasamir sendi skráningu á gsi@golf.is