|
Góða kvöldið góðir félagar.
Það
má með sanni segja að árið 2011 hafi verið mjög viðburðarríkt hjá
Golfklúbbi Grindavíkur.
Nokkur endurnýjun átti sér stað í stjórn GG þar sem þrír
stjórnarmenn gáfu ekki kost á sér til áframhaldandi starfa. Það
voru þeir Gerða Hammer, Leifur Guðjónsson,Hafþór Skúlason og Ingimar
Waldorff á fyrri hluta tímabilsins. Kunnum við þeim þakkir fyrir
þeirra framlag í þágu klúbbsins. Í stað þeirra voru eftirtaldir
kosnir: Jón Júlíus Karlsson og Jón Guðmundsson. Til vara voru
Halldór Jóel Ingvason og Gunnar Oddgeir Sigurðsson.
Stjórnarfundir voru fastsettir fyrsta þriðjudag hvers mánaðar og
oftar ef þurfa þótti.
Leit stjórnin því þannig út:
Páll Erlingsson – formaður
Jóhann Freyr Einarsson – varaformaður og með yfirumsjón með
stækkunarnefnd
Sigvaldi Þorsteinsson– gjaldkeri
Gunnar Oddgeir Sigurðsson – meðstjórnandi með yfirumsjón með
mótanefnd
Jón Guðmundsson – meðstjórnandi með yfirumsjón yfir byggingarnefnd
Páll Þorbjörnsson – meðstjórnandi og með yfirumsjón yfir vallarnefnd
Jón Júlíus Karlsson - ritari og með yfirumsjón yfir mótanefnd
– varastjórn Halldór Jóel Ingvason með yfirumsjón yfir bygginganefnd
og Friðrik Ámundason með yfirumsjón yfir barna- og unglingastarfinu.
Að
þessu sinni hefur Páll Þorbjörnsson ákveðið að gefa ekki kost á sér
að nýju í stjórn fyrir árið 2011 og þökkum við honum góð störf. Án
hans hefðum við ekki náð að auka við starfsmannafjöldann með svo
litlum tilkostnaði.
Eins og menn muna frá árinu 2008 studdu bæjaryfirvöld dyggilega við
bakið á Golfklúbbi Grindavíkur með styrkveitingu að upphæð 51
milljón króna. Í dag hefur Grindavíkurbær greitt 45.7 milljónir af
styrknum. Stjórn Golfklúbbsins kann bæjaryfirvöldum miklar þakkir
fyrir rausnarlegt framlag.
Stækkunarframkvæmdum var framhaldið á árinu og nú er svo komið að
sáð hefur verið í allar nýjar flatir og brautir. Sama gildir um
framkvæmdir við stígagerð og heildrænt útlit á 18. holu velli eru
farnar að skila sér svo um munar. Þar má þakka Bjarna Hannessyni
fyrir ósérhlífni og ómælda vinnu því án hans eljusemi hefðum við
ekki staðið í góðum sporum.
Nú
er svo komið að það hyllir undir opnun 18 holu golfvallar sem mun
koma kylfingum virkilega á óvart. Það fengu félagsmenn og
velunnarar að reyna í síðbúnu 30 ára afmælismóti sem haldið var í
byrjun september. Þá var völlurinn í fyrsta sinn leikinn sem 18
holu völlur og nálægt því sem framtíðarskipulagið sagði til um. Það
var í einmunablíðu, sól og hita, sem kylfingar fengu loksins að
reyna á hæfileikana sína og berja nýju holurnar augum. Menn héldu
ekki vatni yfir því hvernig til hafi tekist og allir brostu sínu
breiðasta þó árangurinn í mótinu væri ærið misjafn. Félagar
kepptust við að lofa þessar breytingar og margir hverjir voru eins
og lítil börn að opna jólapakkann sinn eftir langa og óþreyjufulla
bið. Að móti loknu var haldið afmælishóf í framtíðar golfskála
GG-manna. Þar voru m.a. annara félagar heiðraðir fyrir störf sín í
þágu klúbbsins og golfíþróttarinnar.
Þeir sem fengu
gullmerki klúbbsins voru: Aðalgeir Georg Daði Johansen, Arnar
Sigurþórsson, Bjarni Andrésson, Bragi Ingvason, Kristín Ingeborg
Mogensen, Hjálmar Hallgrímsson og Gunnar Már Gunnarsson. Tveir
aðilar voru heiðraðir af GSÍ og fengu gullmerki þess: Halldór
Ingvason og Aðalgeir Georg Daði Johansen fyrrum formenn GG.
Að síðustu heiðruðu félagar klúbbsins Jón Guðmundusson (Jón Píp) og
gerðu hann að heiðursfélaga fyrir óeigingjarnt starf og fórnfýsi í
þágu klúbbsins.
Afmælismótið var aðeins forsmekkurinn að því sem koma skyldi. Því
ákveðið hafði verið að halda Opið afmælismót síðar í
septembermánuði.
Sérstök afmælisnefnd var fengin til að halda utan um og afla
verðlauna fyrir mótið. Það var haldið með miklum glæsibrag.
Heildarverðlaun í mótinu voru rúmlega 400 þúsund krónur. Um 108
manns tóku þátt í ágætisveðri.
Afmælisnefndina skipuðu Kristín Mogensen, Halldór Jóel Ingvason,
Jón Halldór Gíslason og Bjarni Andrésson. Kunnum við þeim bestu
þakkir fyrir.
Helstu styrktaraðilar mótsins voru Þorbjörninn, Vísir, Samhentir og
Nettó. Þessi fyrirtæki eiga miklar þakkir skyldar fyrir sitt
framlag.
Samhliða stækkuninni hafa nokkrir vaskir einstaklingar unnið við að
endurbyggja og stækka íbúðarhús í eigu golfklúbbsins. Markmiðið að
þar verði framtíðar golfskáli okkar félagsmanna tekinn í notkun
sumarið 2012 og mun verða bylting í aðbúnaði og á aðstöðu fyrir
félaga og gesti golfklúbbsins.
Stækkunin og endurbæturnar kosta að sjálfsögðu þó nokkurn
skildinginn en kostnaði hefur verið haldið í algjöru lágmarki með
sjálfboðavinnu og miklum velvilja fyrirtækja og einstaklinga. Þar
ber sérstaklega að nefna Halldór Ingva, Jón píp, Gísla Jóns, Eðvarð
Sigmars, Willar Óla, Sveinn Ísaks, Steinþór Þorvalds, Sigvalda,
Birgi Bjarna, Tomma í TG raf, Magga í Grindinni og fleiri sem hafa
gefið sína vinnu. Kostnaður við skálann er kominn í 8.5 milljónir.
Tekið var lán að upphæð 7 milljónir króna til að halda verkinu
gangandi og lítur vel út með framhaldið. Viðbygging við
íbúðarhúsnæðið er um 80 m2 sem gerir að verkum að heildarflöturinn
er um 180 m2 og allt á einni hæð.
Allt gengur því samkvæmt áætlun og völlurinn er að taka á sig betri
mynd eftir því sem dagarnir líða.
Það er með ólíkindum hversu mikið við höfum náð að framkvæma á árinu
2011, sérstaklega þegar tekið er tillit til þess að Grindavíkurbær
greiddi einungis 1.5 milljónir í stækkunarstyrk á árinu og ákvað að
fresta síðustu styrktargreiðslunum. Enn á eftir að greiða út 5.3
milljónir af styrknum.
Keypt var lítil beltagrafa á 1.2 milljónir króna og vinnubíll fyrir
völlinn á 1 milljón, auk pallbíls sem IAV seldi okkur með miklum
afslætti á 550 þúsund.
Þess vegna má segja að það sé kraftaverki nær að við höfum náð að
halda úti áformum okkar í stækkunarmálum og gott betur án opinbers
fjármagns á þessu ári.
Einnig má geta þess að við að hluta til endurgreitt þær tæpu 7
milljónir króna sem fengnar voru til að greiða niður óhagstæð
langtímalán í lok árs 2008 auk þess að greiða tapið sem varð á
peningamarkssjóðnum að upphæð rúmlega 5 milljónum. Samtals um 12
milljónir króna. Það náum við með hagræðingu, vinnuframlagi ófárra
manna við stækkunarframkvæmdirnar og afgangi af rekstrarfé.
Við höfum náð að framkvæma og vinna vel úr því fjármagni sem okkur
hefur verið ætlað, þó enn sé nokkuð eftir á leið okkar. Má þar
nefna sandgryfjur, ný teigaskilti, bekki og slíkt sem er á teigum
ásamt fleiri atriðum sem munu koma nánar í ljós. Reiknast til að
kostnaður við fullgerðan völlinn muni fara fram úr 51 milljón, þar
sem áætlun gerir ráð fyrir um 12 milljón króna viðbótarkostnaði á
árunum 2012-13.
Þegar litið er yfir þau verk sem unnin hafa verið í gegnum tíðina
mætti halda að golfklúbburinn væri með félagatal á við stærstu
klúbba landsins. Þess vegna er það líka aðdáunarvert og eftir því
tekið hversu stórhuga menn eru í öllum verkum. Það gerist þó ekki
án mikils og ómetanlegs stuðnings fyrirtækja hér í bæ. Þau eiga
miklar þakkir skildar fyrir tiltrú og velvilja í verki.
Í
haust bárust stjórn GG þær fréttir að núverandi golfskáli er ekki
skráður í eigu golfklúbbsins. Árið 2008 færði Fjársýsla ríkisins
húsnæðið undir sína eign. Eins og flestir félagar vita, þá hafði
Golfklúbburinn fengið húsnæðið að gjöf frá ríkinu og byggði
núverandi golfskála upp með sínu fjármagni og sjálfboðavinnu. Því
miður er ekki til neinn samningur sem sannar okkar eignarhald á
skálanum og því erfitt að sækja það mál. Þó eru aðilar á vegum
golfklúbbsins að skoða þau mál fyrir okkur. Vonumst við til að
farsæl lausn fáist í þetta vandræðamál og eignarhaldið verið
ótvírætt okkar. Á meðan það er óljóst er fásinna að fara í viðgerðir
eða endurbætur á húsnæðinu.
Eins og áður hefur verið nefnt er það mikilvægt golfklúbbnum að
regluleg nýliðun félaga eigi sér stað. Á síðastliðnu starfsári setti
stjórn GG sér það takmark að ná inn á hverju ári um 10-15 nýjum
félögum undir 16 ára aldri. Það hefur reynst þrautinni þyngra því
mikil samkeppni er um ungviðið í íþrótta- og æskulýðsstarfi. En til
að svo megi verða þarf þessi hópur gott aðhald og góða kennslu. Um
síðustu áramót var ákveðið að ráða Jóhann Kristinn Hjaltason PGA
kennara til að sinna þessum málum og mynda heildræna stefnu í barna-
og unglingastarfi. Kennslan fór að mestu fram á Rollutúninu en
eldri og reyndar krakkarnir æfðu þó á æfingasvæðinu við
Húsatóftavöll. Rollutúnið sannaði sig rækilega því með þessu náðist
að mynda 20-30 manna kjarna sem stundaði æfingar og kennslu af kappi
en heildartala þeirra með þeim sem mættu óreglulega var nálægt 40
krökkum.
Í
lok sumars tók unglingasveit GG tók þátt í sveitakeppni GSÍ á
Flúðum. Árangurinn var mjög viðunandi en það sést vel að við eigum
enn óunnið verk fyrir höndum til að nálgast sveitir á
höfuðborgarsvæðinu og voru menn á því að góður efniviður er fyrir
hendi. Það eitt og sér segir til um þær væntingar og metnað sem
lagður er í þennan þátt GG.
Þess má geta að stjórn GG hvatti yngri kylfinga sína til þátttöku á
Áskorendamótaröð GSÍ og voru að meðaltali 2-3 unglingar sem tóku
þátt í hverju móti. Sá einstæði árangur náðist að Sigurður Helgi
Hallfreðsson sigraði í heildarstigakeppninni í sínum aldursflokki á
Áskorendamótaröðinni. Sannarlega góður árangur og gefur góð
fyrirheit.
Árið 2008 sótti þáverandi stjórn um að fá „Rollutúnið til afnota
undir par 3 völl sem væri öllum opinn án endurgjalds. Skemmst er
frá því að segja að par 3 völlurinn hefur svo sannarlega hitt í mark
og reglulega sjást bæjarbúar á öllum aldri rölta um völlinn sér til
ánægju við æfingar og leik. Golfklúbburinn samdi við Grindavíkurbæ
um viðhald á vellinum í sumar ásamt því að sjá um slátt á
púttvelinum við Víðihlíð. Það eitt og sér hefur sannað gildi sitt
gagnvart aukinni þjónustu við bæjarbúa og gesti bæjarins og mun
eftir sem áður einnig gegna lykilhlutverki í barna- og
unglingastarfi klúbbsins. Völlurinn er staðsettur á móti
tjaldsvæðinu sem þýðir aukna valkosti fyrir gesti bæjarins varðandi
skemmtun og afþreyingu.
Sá
samningur ásamt sláttusamningi er nú í uppnámi þar sem
Grindavíkurbær hefur hugsað sér að kaupa sláttuvél til að sjá um þau
mál sjálfir. Þar reiknast okkur til að rúmlega 2 milljóna
rekstrarfé hverfi með þessari ráðstöfun bæjarins. Það er slæmt mál,
sérstaklega á þessum tímum sem mikil uppbygging og kostnaður
samhliða henni hvílir á golfklúbbnum. Sama gildir um
styrktarsamning bæjarins vegna barna og unglingastarfsins. Sú
fjárhæð lækkaði úr 1.8 milljónum í 1 milljón þrátt fyrir aukna
áherslu golfklúbbsins í uppbyggingastarfi barna og unglinga.
Styrktarsamningar gegna að sjálfsögðu lykilhlutverki í starfi
íþróttafélaga og er Golfklúbbur Grindavíkur engin undantekning á
því. Staða þeirra mála er mjög góð miðað við samdrátt á þessu sviði
eins og gefur að skilja þar sem erfiðara hefur reynst að afla
fjármagns frá fyrirtækjum og velunnurum. Stjórnin hafði á árinu
2011 samband við og heimsótti fjölda fyrirtækja, bæði hér innan
Grindavíkur og á höfuðborgarsvæðinu með það fyrir augum að ná inn
fleiri styrkjum. Það gerði það að verkum að N1, IAV,
Byggingvöruverslun Ísleifs Jónssonar, Magma Energy og aðrir minni
styrktaraðilar gengu til liðs við okkur. Auk þessa hafa rótgrónir
og dyggir styrktaraðilar haldið tryggð sína við okkur, má þar nefna
Þorbjörninn, Vísir úgerðarfélag, Einhamar, Landsbankinn,
Hérastubbur bakarí, Veiðafæraþjónustan, Vélsmiðja Grindavíkur,
Norðurál, Bláa Lónið, Vífilfell og Grindin. Kunnum við þeim mikla
þakkir fyrir dyggan stuðning. Án þeirra værum við ekki í þeim
sporum að opna bráðlega 18 holu golfvöll. Fleiri fyrirtæki hafa
gefið vilyrði fyrir samstarfi á næsta ári. Það lítur því nokkuð vel
út með hægt verði að fylla brautarsamninga á 18 holu golfvelli.
Reiknast okkur til að um 3 brautir verði lausar eftir áramótin.
Sumir styrktaraðilanna eru, þrátt fyrir góða styrki, ekki með
brautarsamninga.
Í
dag eru 209 skráðir félagar í Golfklúbb Grindavíkur. Það er örlítil
fækkun frá því í fyrra og má finna rætur í því að
félagaskráningakerfið var tekið til endurskoðunar og hreinsaðir út
félagar sem ekki voru virkir og greiddu ekki félagsgjald. Við
héldum 27 mót í sumar, þar af 18 innanfélagsmót. Stigamótin voru
12 og þátttaka að meðaltali um 40 manns í hverju móti, sem er mjög
gott. Það er svipaður fjöldi og árið 2011. Vel gekk að fá
styrktaraðila fyrir stigamótin og allan heiðurinn á Jón Halldór
Gíslason sem tók að sér að afla styrktaraðila. Það er í fyrsta
skipti í nokkur ár að það náðist að fá fyrirtæki til að styrkja öll
stigamótin.
Á
árinu 2011 tóku 1.270 manns þátt í mótum á okkar vegum. Það er
aukning um 170 manns frá fyrra ári. Það segir líka sína sögu þar
sem nokkrum mótum var aflýst vegna dræmrar þátttöku og slæms
veðurs. Vonir standa til að mun fleiri muni taka þátt á næsta ári
þegar völurinn verður 18 holur.
Völlurinn var í frábæru standi í sumar enda með mikinn fagmann við
stjórnvölinn á vellinum. Vallarstjóri síðastliðið sumar var Bjarni
Þór Hannesson og þakka ég honum frábær störf en að hans sögn væntir
hann mun betri árangurs af starfinu en það sem þegar hefur birst
kylfingum. Svo mikið segir það um metnað hans á þessu sviði.
Aðsókn á völlinn hefur aukist svo um munar og má þar þakka miklu og
góðu umtali um völlinn og frábæru starfi vallarstjóra og hans
starfsmanna. Þó er sú tala alls ekki tæmandi þar sem gagnkvæmur
samningur um 1.000 kr gjald er milli GS og GG, GSG og GG, GG og
Selfoss, GG og GOB; 1.500 kr. gjald milli GG og Hellu og milli GG og
Glanna, 50% afsláttur milli GG og GV. Það er nokkur aukning í
vinavallasamningum frá árinu 2010.
En
heildarfjöldi frá GS á Húsatóftavelli í sumar 240 gestakomur og 70
frá GSG. Heimsóknir okkar félaga til GS voru 64 talsins en minna frá
öðrum golfklúbbum. Það er mikil breyting til batnaðar og stjórnir
þessara klúbba eru sammála að góð lending hafi verið í samvinnu
þeirra í milli, því í stað þess að fá ekki neitt fyrir sinn snúð
fengum við um 350 þúsund kr. aukalega.
Samningur var einnig gerður við Golfklúbbinn Odd um að þeir greiddu
235.000 kr gjald í upphafi og síðan 1.000 kr. per kylfing en 220
kylfingar frá Oddi léku völlinn í sumar. Einnig var samningur
gerður við Arion banka um að félagar þeirra fengu að leika völlinn
gegn því að starfsmannafélag þeirra greiddi 2.500 kr per heimsókn.
Það gerði að lokum rúmlega 200 þúsund krónur.
Í
meistaramóti klúbbsins tóku 73 manns þátt og er það aukning um 7
manns frá fyrra ári sem þó var metár.
Davíð Arthur Friðriksson var meistari karla með nokkrum yfirburðum
líkt og árið þar á undan og kvennameistari í ár var Svanhvít Helga
Hammer. Meistaramót unglinga var haldið vikuna áður og tóku 8
unglingar þátt. Sigurvegari varð Lárus Guðmundsson en hann sigarði
með miklum yfirburðum líkt og árið áður. Við óskum þeim innilega til
hamingju með árangurinn. Lokahófið var síðan haldið í sal
Verkalýðsfélags Grindavíkur og tókst vel til. Það mun þó verða í
síðasta sinn sem lokahóf meistaramótsins verður haldið í salarkynnum
utan golfklúbbsins, því nýi skálinn mun eftirleiðis rúma það hóf.
Stigamótsmeistari þetta árið var Kristinn Sörensen en hann sigraði
nokkuð örugglega á heildarstigum. Bikarmeistari varð Jón Júlíus
Karlsson og Tóftabóndi þetta árið varð Ingvar Guðjónsson.
Sveitakeppni GSÍ í 3. deild var haldin á Húsatóftavelli um miðjan
ágúst. Í sveit Grindavíkur voru Davíð Arthúr Friðriksson, Kristinn
Sörensen, Ingvar Guðjónsson, Hávarður Gunnarsson, Þorlákur
Halldórsson og Leifur Guðjónsson. Liðsstjóri var Gunnar Már
Gunnarsson líkt og undanfarin ár.
Það er skemmst frá því að segja að Grindavík lenti þar í þriðja sæti
og var stutt frá því að komast upp í 2. deild.
Eins og áður hefur verið nefnt, hafa átt sér stað miklar framkvæmdir
á Húsatóftavelli hefur mörgu verkinu verið ýtt úr vör á síðastliðnu
ári og allt lítur út fyrir að margur draumurinn verði að veruleika á
árinu 2012. Brautir og flatir að taka á sig skýra mynd, stígargerð
langt komin og sandgryfjur sett nýjan svip á gamlar brautir. Allt
stækkunarverkið er í öruggum höndum Bjarna vallarstjóra.
Næsta ár mun skera úr um okkar framtíðarmöguleika. Þrátt fyrir að
fjármagn verði af skornum skammti, eru menn mjög bjartsýnir á
framhaldið og hugsa stórt og vænta mikils. Enda hefur völlurinn og
umhverfið allt uppá að bjóða til að verða meðal vinsælustu
golfvöllum landsins.
Til
þess að svo geti orðið mun mikið reyna á félagsmenn og að þeir
aðstoði við uppbygginguna, þar má nefna þátttaka í mótahaldi,
endurbyggingu íbúðarhússins og framtíðarskála ofl. Á næstu árum
þarf klúbburinn að fara í fleiri framkvæmdir, s.s. enduruppbyggingu
æfingasvæðis, bílastæða við golfskála, vélageymslu og fleira. Áttum
okkur á því að styrkleiki klúbbsins byggir á ósérhlífnu
sjálfboðastarfi og vilja til verka. Er þar enginn undanskilinn.
Tökum höndum saman við að gera góðan klúbb enn betri. Það er undir
félagsmönnum komið hvaða vegleið verður farin. Mikilvægt er að átta
sig á að það er okkur dýrmætt að geta lagt af mörkum í
sjálfboðastarf og um leið látið drauminn rætast að geta opnað nýjan
völl með húsnæði sem hentar starfseminni.
Með
þessum orðum læt ég nægja tölu mína um það starf sem rækt var innan
Golfklúbbs Grindavíkur á síðastliðnu ári. Góðar stundir.
Félagskveðja,
Páll Erlingsson
Formaður Golfklúbbs Grindavíkur |
