5. maí
Úrslit í Opna Veiðafæraþjónustan - Texas Scramble

Opna Veiðarfæraþjónustan mótið fór fram á Húsatóftavelli í dag og tóku alls 38 sveitir þátt í mótinu. Nokkuð hvasst var í Grindavík og sást það berlega á skorinu. Það var sveit 2 amigos skipuð þeim
Hávarði Gunnarssyni og Ingvari Guðjónssyni, félögum úr GG, sem fóru með sigur af hólmi í mótinu. Þeir léku á 65 höggum nettó og urðu einu höggi á undan tveimur sveitum sem urðu í öðru til þriðja sæti.

Gourmet, sveit skipuð þeim Helga Birki Þórissyni úr GSE og Styrmi Guðmundssyni úr GO, varð í öðru sæti á 66 höggum. Fræknir frændur, skipuð þeim Jóni Gunnari Gunnarssyni og Ágústi Ársælssyni, úr GK, urðu í þriðja sæti einnig á 66 höggum nettó en á lakari seinni níu holum.

Veitt voru nándarverðlaun á tveimur brautum.
Á 8. braut var Davíð Arthur Friðriksson úr GG næstur holu, 3,85 metra.
Á 13. braut var það Eyjólfur A. Gunnarsson úr GS sem var næstur holu eða 1,1 metra.
Verðlaun í mótinu má nálgast í golfskála Grindavíkur eða með að hafa samband við gggolf@gggolf.is.

4. maí
Félagsskírteini GG 2012

Félagsmenn athugið að félagsskírteini/pokamerki og boltakort Golfklúbbs Grindavíkur eru tilbúin til afhendingar og má vitja þeirra í golfskála GG. Opnunartími er frá 09:00 – 20:00. Aðeins þeir félagsmenn sem gengið hafa frá greiðslu árgjaldi eiga rétt á að leika völlinn án þess að greiða fyrir það, en frá og með 7. maí verður lokað fyrir aðgang allra að www.golf.is, sem ekki hafa gengið frá greiðslu á árgjaldi. Félagar þurfa að hafa félagsskírteinið meðferðis þegar leikið er á Húsatóftavelli.

2. maí
Tappagötun mánudaginn 7. maí

Mánudaginn 7. maí munum við hefjast handa við að tappagata flatirnar.  Áætlað er að verkið taki okkur 2 daga.  Borin verður á hæglosandi áburður og að lokum verða þær sandaðar til að fylla upp í götin og slétta yfirborðið. 

Þessi aðgerð er ekki mjög vinsæl á meðal kylfinga, en meðlimum GG ætti nú orðið að vera ljóst hversu mikilvæg aðgerð þetta er.  Það er ekki tilviljun að flatirnar séu búnar að vera jafn góðar og þær hafa verið núna í vor.  Ef flatirnar eru skoðaðar vel, þá sjást vel förin eftir tappagötun síðasta árs, en grasið er mun heilbrigðara þar (grænar doppur á flötunum). 

Þar sem að flatirnar eru í nokkuð góðu ásigkomulagi nú þegar, þá má búast við því að þær verði fljótar að jafna sig eftir aðgerðina.  Það hjálpar mikið að núna höfum við fjárfest í valtara sem mun flýta þessu ferli enn frekar.  Það má líka rifja það upp að flatirnar voru tappagataðar 17 dögum fyrir Sveitakeppnina í fyrra, en samt voru menn gríðarlega ánægðir með ástand þeirra þá.  Flatirnar eru mun fljótari að jafna sig en marga grunar. 

Ég vona að kylfingar sýni okkur skilning á þessu og þolinmæði.  Markmiðið er að bjóða upp á góðar flatir sem fyrst að vori og sem lengst inn í haustið.  Við lékum golf inn á mjög góðar sumarflatir nánast inn í desember á síðasta ári, og buðum upp á gott rennsli á sumarflötum strax í apríl í ár.  Götunin hefur átt stóran þátt í því að gera okkur þetta kleift. 

Bjarni Þór
Vallastjóri

2. maí
Afmælisblað GG komið á vefinn

Golfklúbbur Grindavíkur hefur gefið út veglegt afmælisblað í tilefni af þrjátíu ára sögu klúbbsins. Hægt er að nálgast blaðið með því að smella á þessa vefslóð

Afmælisblað

30. apríl
Stigamót 1 þann 1.maí  - völlurinn opinn almenningi

Á morgun þriðjudaginn 1. maí verður fyrsta stigamót sumarsins á Húsatóftavelli.  Völlurinn er vægast sagt í frábæru standi og þeir gestir sem lagt hafa leið sína til okkar hafa ausið völlinn lofi og sagt að aðstæðurnar jafnist á við góða velli erlendis.  Þess má geta að þó stigamót séu í gangi hverju sinni, þá er völlurinn alltaf opinn fyrir almennri umferð. 

29. apríl
Gott skor í fimmta Skálamóti GG

Það voru um 110 kylfingar sem tóku þátt í fimmta Skálamóti Golfklúbbs Grindavíkur sem fram fór í dag á Húsatóftavelli í góðu veðri. Tinna Jóhannsdóttir úr Keili lék best allra í mótinu en hún lék völlinn á 69 höggum eða tveimur höggum undir pari. Hún sigraði í höggleiknum en  Hafþór Örn Þórðarson úr GS og Ágúst Ársælsson úr GK urðu jafnir í 2.-3. sæti á 72 höggum.
 

Hafþór Örn reyndist hlutskarpastur í punktakeppninni en hann nældi sér í alls 44 punkta á hringnum. Þar sem hann reyndist með ólöglega forgjöf þá var það Sveinbjörn Guðmundsson úr GK sem fór með sigur af hólmi. Andri Ágústsson úr GKj varð annar með 41 punkt og Sigvaldi Þorsteinsson úr GG varð þriðji á 40 punktum.

Mikil ánægja var meðal keppenda með Húsatóftavöll sem er í frábæru ástandi og er líklega einn af betri völlum landsins um þessar mundir. Orð þátttakenda í mótinu í klúbbhúsi staðfesta það sem er mikið ánægjuefni fyrir GG. Húsatóftavöllur stækkar í 18 holu í sumar og því er stórt golfsumarið hafið í Grindavík. Fyrirhugað er opið mót á Húsatóftavelli um næstu helgi og hvetjum við áhugasama kylfinga til að skrá sig.

Efstu menn í punktakeppni:
1 Sveinbjörn Guðmundsson GK 41 punktar
2 Andri Ágústsson GKJ 41
3 Sigvaldi Þorsteinsson GG 40
4 Valur Kristjánsson NK 39
5 Jón Þorkell Jónasson GS 38
6 Ágúst Ársælsson GK 38

Efstu menn í höggleik:
1 Tinna Jóhannsdóttir GK 69 -2
2 Rögnvaldur Magnússon GBO 71 par
3 Hafþór Örn Þórðarson GS 72 +1
4 Ágúst Ársælsson GK 72 +1
5 Jón Valgarð Gústafsson GV 74 +3
6 Steinn Baugur Gunnarsson NK 74 +3
7 Hávarður Gunnarsson GG 74 +3
8 Edwin Roald Rögnvaldsson GEY 74 +3

Nándarverðlaun:
8. hola: Jón Haldór Gíslason, GG – 4,94 m
13. hola: Daníel Eyjólfsson, GG – 29 cm

28. apríl
Sami hraði á flötunum á Húsatóftavelli og í júlí

Húsatóftavöllur hefur komið frábærlega undan vetri og muna elstu félagar GG ekki eftir að völlurinn hafi litið svona vel út í aprílmánuði. Við fengum Bjarna Hannesson, vallarstjóra, til að útskýra hvers vegna völlurinn væri svona góður í ár.

Hefur þú einhverja skýringu á því hvers vegna völlurinn er svona góður miðað við árstíma?
Það er ekkert eitt sem veldur þessu, heldur er þetta samblanda margra þátta. Tappagötun og söndun undanfarinna tveggja ára er að tryggja heilbrigðari flatir sem lifa betur af vetrar kafla og eru fyrr til að vori. Haustáburður, þar sem borið er á eftir að laufvexti er lokið, hefur einnig skilað góðum árangri. Þá er verið að bera lítið magn af áburði reglulega á flatirnar langt inn í haustið. Þetta hjálpar plöntum að ljóstilífa inn í haustið og eykur þannig framleiðslu á kolvetnum sem hjálpar plöntunni að taka við sér að vori.
Þegar vora fer, þá hef ég verið að úða reglulega út áburði til að koma plöntunni af stað og tryggja að hún fái þá næringu sem hún þarf til að þola kuldakafla vorsins. Þetta er ekki mikill áburður sem er borinn á, heldur er réttur áburður í réttu magni borin á, á réttum tíma. Það skiptir því mjög miklu máli að þekkja efnafræðina á bakvið áburðinn og starfsemi plöntunnar í þaula, ef það á að ná að lengja tímabilið af einhverju marki.
Þessi blanda skilar sér í góðum flötum fyrr á árinu. Veðráttan hefur hinsvegar einnig mikið að segja, og stór ástæða fyrir því að við erum að opna inn á góðar sumarflatir meira en mánuði fyrr þetta árið, er út af því að frost var lítið sem ekkert í jörðu þetta árið.

Má þá ekki búast við að völlurinn verði í frábæru ásigkomulagi í sumar?
Miðað við það að við höfum verið að ná rennsli á flötunum upp á 8 fet á stimp núna í apríl, þá má búast við góðu golfsumri í Grindavík. Þetta rennsli er það sama og við vorum að bjóða upp á í júlí og ágúst í fyrra.

Hvernig koma nýju holurnar undan vetri?
Flatirnar eru mjög góðar. Við sáðum í þær undir lok sumarsins 2010, þannig að þær eru orðnar vel þéttar. Brautirnar eiga enn nokkuð í land, en þær ættu að loka sér hratt núna í sumar þegar við yfirsáum í þær. Það góða er að af þeim 5 holum sem við erum að bæta við, þá eru þrjár þeirra par-3 holur. Þannig að það verða fá högg leikin af brautum.

Ertu farinn að sjá fyrir þér hvenær völlurinn opnar sem 18 holur?
Ég er mjög hógvær og er að spá því að þetta verði um mánaðarmótin júlí/ágúst, en við reynum okkar besta að ná þessu fyrir meistaramót. Veðurfarið í vor og fyrriparts sumars ræður miklu þar um.

...

Við minnum kylfinga á að Skálamót 5 fer fram á Húsatóftavelli næstkomandi sunnudag. Skráning fer fram á golf.is eða í síma 849-0154 (Jón Júlíus).

28. apríl
Sumaropnun skálans er 1. maí

Þriðjudaginn 1. maí mun golfskálinn opna fyrir kylfinga.  Þá munu afsláttarkort og samstarfsamningar við klúbba og félagasamtök taka gildi.  Húsatóftavöllur hefur þó verið opinn óslitið á sumarflatir frá því í lok mars.  Nú er um að gera fyrir kylfinga að hreinsa kylfurnar og gera sveifluna klára fyrir sumarið.  Völlurinn er í frábæru standi og lofar góðri golfvertíð fyrir alla kylfinga.
Félagar athugið að þeir sem ekki hafa greitt ársgjöld eða gert ráðstafanir í samráði við gjaldkera þurfa að greiða flatargjald hverju sinni.

14.apríl
Frábær þátttaka í Skálmóti 3

Það var frábær mæting í þriðja Skálamót GG í dag. 119 kylfingar voru skráðir til leiks.  Í upphafi var rigninga og fremur kalt í veðri en þegar leið á daginn léti til og hlýnaði.  Völlurinn var í einu orði sagt frábær, flatir eins og þær gerast bestar, hvað þá á þessum árstíma og kylfingar kunnu svo sannarlega að

meta aðstæðurnar, þó skorið væri æði misjafnt.  Orðstýr og umfjöllun um völlin hefur einnig aukist samhliða þessum draumaaðstæðum. Margir sem þátt tóku hafa verið með í öllum skálamótunum til þessa, stærstur hluti gesta frá öðrum klúbbum. Það eitt segir sína sögu um aðstæður.  Rafn Stefán Rafnsson GO sigraði í punktakeppninni á 39 punktum. Þess má geta að Rafn lék einnig á fæstum höggum í mótinu, 70 höggum (einu undir pari) en Rafn hafði þegar unnið til verðlauna með forgjöf og kom það það í hlut Kristins Sörensen að fá verðlaun án forgjafar fyrir 71 högg. Í öðru sæti varð Þórir Guðmundsson GKG á 38 punktum líkt og Kristinn Sörensen GG og Atli Már Grétarsson en þar sem Kristinn fékk verðlaun fyrir besta skorið þá er það Atli sem hlýtur þriðju verðlaun í punktakeppninni.  Nándarverðlaun voru veitt á eftifarandi holum:
Á 8. holu:
Á 13. holu:

Golfklúbburinn þakkar frábæra þátttöku í þessu styrktarmóti og góð orð sem kylfingar höfðu um völlinn að segja.  Við vonumst til að sjá sem flesta kylfinga á Húsatóftavelli í sumar og orð kylfinga gefa góð fyrirheit um það sem koma skal.  Markmiðið er að halda fleiri skálamót ef veðurguðirnir verða okkur hliðhollir.  Nánari úrslit má sjá á www.golf.is

31.mars
Góð mæting í Skálmót GG

Það var góð mæting í Skálamót GG í dag á Húsatóftavelli.  Veðrið lék við kylfinga og minnti það helst á góðan sumardag frekar en marsveður.  Margir höfðu það líka á orði að ekki væri hægt að sjá það á vellinum að vetur væri enn samkvæmt dagatalinu; flatirnar í mjög góðu ástandi sem kom mörgum í opna skjöldu eftir að hafa spilað á vetrarflötum á öðrum völlum.  Skorið skipti greinilega marga litlu máli, því allir komu með bros á vör þó skorið væri æði misjafnt.  Þó voru nokkrir að leika gott golf.  Fremstu meðal jafningja varð Ragnar Davíð GVS á 43 punktum.  Í öðru sæti varð Samúel Karl Arnarson GH á 41 punkti. Í þriðja sæti varð Hjalti Sigvaldason á 39 punktum en hann var á betra skori en Benedikt Sveinsson GK á síðari 9 holunum  Nándarverðlaun voru veitt á eftifarandi holum:
Viggó Sigurðsson á 13. holu ( 106cm)
Ragnar Bjarki á 8. holu (476cm)
Birgir Hermannsson eftir annað högg á 5./18. holu (133cm).

Golfklúbburinn þakkar góða þátttöku í þessu styrktarmóti og vonumst við til að sjá sem flesta kylfinga á Húsatóftavelli í sumar.  Markmiðið er að halda fleiri slík mót ef veðurguðirnir verða okkur hliðhollir.  Nánari úrslit má sjá á www.golf.is

31.mars
Opið á morgun, sunnudag - sumarflatir

Á morgun, sunnudaginn 1. apríl verður opið fyrir almennri umferð á Húsatóftavelli.  Einmuna veðurblíðu er þar um að þakka.  Sumarflatirnar eru eins og á góðum sumardegi. Flatargjald  á völlinn er kr 3000 fyrir einstaklinga.  Verðskrá er eins og á virkum sumardegi. Vinavallasamningar og önnur vildarkjör gilda ekki að þessu sinni.
Hvetjum fólk til að nýta sér tækifærið og njóta þess að spila völlinn í frábæru ástandi. Sjá verðskrá á www.golf.is Markmiðið er að opna um helgar ef tíðarfar er vellinum í hag.

28.mars
Styrktarmót fyrir skálabyggingu laugardaginn 31. mars

Laugardaginn 31. mars verður opið mót á Hústatóftavelli.  Mótið er styrktarmót þar sem allur ágóði rennur í endurbætur og byggingu nýja golfskála okkar Grindvíkinga.
Hér er fyrst og fremst tækifæri fyrir kylfinga að leika á sumarflötum í mars við frábærar aðstæður.

Leikið er með punktafyrirkommulagi

Verðlaun fyrir 3 efstu sætin með forgjöf.
Verðlaunum er stillt í hóf þar sem megintilgangur með mótinu er að fá að leika á sumarflötum við frábærar aðstæður í mars.
Nándarverðlaun á 13. holu (par 3).
Þeir sem hefja leik að loknu hléi (eftir hádegi) hefja leik á 6 holu og eru bakkarnir leiknir tvisvar í lokin (fyrri leikur bakkanna telst til holu 1-5)
Hvetjum menn til að fjölmenna í mótið og taka sumarið snemma :)
Verð er kr 2500.

Mótanefnd

12.mars
Óbreytt vallarmat á Húsatóftavelli fram að opnun 18 holu golfvallar

Fyrir stuttu átti hluti stjórnar GG fund með forgjafarnefnd GSÍ vegna vallarmatsmála á Húsatóftavelli.  Á fundinum viðraði stjórn GG sín sjónarmið varðandi nýtt vallarmat sem taka átti gildi þegar í stað.  Að fundi loknum ákvað forjafanefnd GSÍ að taka tillit til sjónarmiða GG og hafa vallarmatið á Húsatóftavelli óbreytt þar til 18 holu golfvöllur verður tekinn í notkun í sumar.  Nýtt vallarmat skal þó ekki taka gildi síðar en 1. júlí 2012.

Stjórnin

2.mars
Dómaranámskeið GSÍ

Fyrirhuguð námskeið og próf fyrir golfdómara
Dómaranefnd GSÍ hefur lokið við að skipuleggja kennslu í golfreglum fyrir komandi golftímabil. Munu námskeiðin hefjast nú í mars og þau síðustu verða fyrir lok apríl. Nánar tiltekið þá er um eftirfarandi námskeið að ræða.

Endurmenntunarnámskeið:
Nú um áramótin tóku gildi nýjar og breyttar golfreglur. Um leið féllu öll dómaraskírteini úr gildi, þannig að allir þeir sem eru með dómaraskírteini, hvort heldur er héraðs- eða landsdómaraskírteini þurfa að sækja endurmenntunarnámskeið til þess að fá dómaraskírteinin endurnýjuð til næstu 4ra ára. Ákveðið hefur verið að keyra endurmenntunarnámskeið þrisvar og verða þau sem hér segir:

Mánudaginn 12. mars, kl. 19:30 – 22:00
Þriðjudaginn 20. mars kl. 19:30 – 22:00
Laugardaginn 31. mars kl. 10:00 – 12:30

Nóg er að dómarar sæki eitt af þessum námskeiðum þar sem farið verður í þær breytingar sem urðu á golfreglunum nú um áramótin. Ekkert próf er í lok þessara endurmenntunarnámskeiða. Þettta gildir fyrir dómara á okkar vegum sem tóku dómaraprófið í júlí 2010. (Jóhann Freyr, Páll, Valdimar, Þuríður, Gerða Hammer og Arnar Ólafs)

Héraðsdómaranámskeið:
Dómaranefnd GSÍ hefur ákveðið að breyta fyrirkomulagi á héraðsdómaranámskeiðunum. Fyrirkomulag námskeiðanna í ár verður þannig að haldnir verða fjórir 3ja tíma fyrirlestrar þar sem farið verður í gegnum ákveðnar reglur í hverjum fyrirlestri. Þegar fyrirlestraröðinni er lokið verður haldið próf og verður það haldið tvisvar. Fyrirlestrarnir verða sem hér segir:

Mánudaginn 26. mars, kl. 19:00 – 22:00
Fimmtudaginn 29. mars kl. 19:00 – 22:00
Þriðjudaginn 3. apríl kl. 19:00 – 22:00
Miðvikudaginn 11. apríl kl. 19:00 – 22:00

Nánar um það hvaða yfir hvaða reglur verður farið í hverjum fyrirlestri verður auglýst síðar.

Prófin verða haldin sem hér segir:
Laugardaginn 14. apríl kl. 9:30 – 12:00
Þriðjudaginn 24. apríl kl. 19:30 – 22:00

Á undan prófunum verður stuttur fyrirlestur um störf dómara og almennur fyrirspurnatími, en reiknað er með að prófið sjálft taki klukkutíma.

Stefnt er að því að taka upp alla fyrirlestrana þannig að þeir verði aðgengilegir á golf.is fyrir þá sem ekki komast á fyrirlestrana sjálfa.

Þátttökutilkynningar:
Þeir sem áhuga hafa á að taka þátt í einhverjum þessara námskeiða skulu tilkynna sig til skrifstofu GSÍ sem fyrst (gsi@golf.is). Eftir þátttökutilkynningu verða sendar leiðbeiningar til þeirra sem tilkynna sig varðandi undirbúning fyrir námskeiðið.

Stjórnin

24.feb
Skálamót á morgun, laugardag

Í tilefni af veðurblíðunni verður Skálamót á morgun, laugardag 25. febrúar.  Mótið hefst kl. 11:00 og allir ræstir út samtímis. Leikið verður á sumarflötum.  Þátttökugjald er kr 1.500. Mótið er punktamót með forgjöf. Einföld verðlaun eru í boði.  Aðal ánægjan er að fá að leika á sumarflötum.
1. verðlaun - 8.000 kr gjafakort í Golfbúð Hafnarfjarðar
2. verðlaun - Dúsín af Callaway golfboltum
3. verðlaun - Hálft dúsín af Callaway golfboltum
Nándarverðlaun á 13. holu - Hálft dúsín af Callaway golfboltum

Innkoma af mótinu fer í endurbætur á framtíðar golfskála okkar GG manna.

Mótanefnd